Udal finantzaketa tresna nagusia %20 txiki daiteke

Udal Finantzaketa Foru Fondoko (UFFF) hirugarren hiru hilabeteko ordainketa jaso zuten Debagoieneko udalek abuztuaren 25ean eta, aurreko hiruhilekoetan bezala, orain ere Foru Aldundiari dirua bueltatzea egokitu zaie: 9,64 milioi egokitzen zitzaien, baina, diru-itzulera deskontatu eta gero, 7,87 milioi jaso dituzte; hau da, hasierako kopurua baino %6,12 gutxiago.

Hiru hilero, horrela jokatzen dute, krisiak eragindako zerga bilketa murritzagoak zuloa sortu baitu Foru Aldundiaren kontuetan. Ondorioz, Fondo hori "%20 baino gehiago txikitzera irits" litekeela ohartarazten du Ogasunak.

Gipuzkoako Ogasunak diru gutxiago batzen dihardu aurten zerga bidez, eta, horren ondorio gisa, udalek dirua bueltatu behar diote. 2008ko likidazioa zortzi zatitan ordaintzen dabiltza. Debagoieneko udal arduradunek joan den hiruhileko likidazioaren harira azaldu zituzten beldurrak baieztatze aldera egiten du Aldundiak: "Zerga-bilketaren desbideratze honen ondorioz, UFFF ere murriztu egingo da, eta aurrekontuarekin konparatuz %20 baino gehiago txikitzera ere iritsi liteke".

Maiatzera arte, %21,3

Gipuzkoako Ogasunak emandako datuen arabera, ekainaren 30era arte, Gipuzkoan, zerga-bilketa likidoa %24 txikitu zen aurreko urtearekin alderatuta. Maiatzera arte, jaitsiera hori %21,3 izan zen; beraz, ekainean, 2,7 puntu murriztu zen bilketa.

Zerga-bilketa likidoak izandako murrizketa horrek bi osagai ditu, Ogasunak azaltzen duenez: zerga-bilketa gordina %9 txikitu izana, batetik; eta itzulketak %24,7 handitu izana.

Fondoaren 3. hiru hileko kontuak

Herria Kuota 2008ko likid.
Tokiko kred. bankua
Jasotakoa
Antzuola 29.147,54 19.702,79   309.444,75
Aretxabaleta 1.019.321,93 61.515,27 95.780,67 862.015,99
Arrasate 3.456.104,71 213.299,95   3.242.704,76
Bergara 2.307.887,38 141.697,45 1.083.094,97 1.083.094,96
Elgeta 171.299,17 10.216,09   161.083,08
Eskoriatza 619.240,66 37.570,39   581.670,27
Leintz Gatzaga
56.971,77 3.493,22   53.478,55
Oñati 1.683.230,74 102.986,48   1.580.244,26
Guztira 9.643.203,9 590.581,64 1.178.875,64 7.873.746,62
Iturria: Gipuzkoako Foru Ogasuna (kopuruak eurotan)

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.