Autobuserako txartel bateratua egiteko inprimakiak eskuragarri daude

Beste zenbait herritan baino hilabete batzuk beranduago, baina azkenean, astelehenetik aurrera autobus txartel bateratua erabiltzeko aukera egongo da Debagoienean. Txartela eskuratzeko bete beharreko inprimakiak jada eskuragarri daude gure herrietako zenbait liburu-denda eta estankotan.

Gipuzkoa osorako autobus txartel bakarra ekainaren 4an jarri zen martxan, baina zerbitzu hori orain artean ezin izan da Debagoienean erabili. Astelehenetik aurrera baina indarrean egongo da gurean ere. Txartela eskuratzeko bete beharreko inprimakiak, baina, eskuragarri daude jada zenbait estanko, liburu-denda eta kioskotan:

  • Arrasaten, Martxas eta Portaloiko kioskoetan, Garai estankoan eta Ttukun liburu-dendan.
  • Bergaran, Isabel kioskoan eta Ikasbi liburu-dendan.
  • Oñatin, Hirukar liburu-dendan eta Altuna estankoan.
  • Aretxabaletan, Ibarra estankoan eta Alfredo liburu-dendan.
  • Eskoriatzan, Adela liburu-dendan.
  • Antzuolan, Altzarte okindegian.
Txartel bakarraren erabilera bultzatzeko gainera, Arantxa Tapia mugikortasun diputatuak iragarri du txartel bateratua erabiltzeak deskontuak ekarriko dituela: lehenengo bidaiatik hasita %40ko deskontua; 40 bidaiatik aurrera %70ekoa; eta 70 bidaiatik aurrera, %90ekoa. Aurrera begira, familia ugarientzat edota sarrera baxuko jendearentzat beste era bateko  hobespenak ere ezarriko dituztela aurreratu du Tapiak.


ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.