Istripu asko izan dira gaur gurean. 10:30ean, Arrasaten, GI-627 errepidean izan da istripurik larriena. Bi kamioi eta auto batek talka egin dute. Zorionez ez da zauriturik egon.
San Prudentzion eta AP1 autobidean ere egon dira bat baino gehiago. Txikiak guztiak, baina nahikoa trafikoa oztopatu eta buruhausteak sortzeko. Izan ere, egoera ez da erraza izan. Elurrak eta izotzak asko zaildu dute zirkulazioa. Ondo ekipatuta egon ezean, hobeto etxean gelditzea.
Gidari gehienak zuhurtziaz jokatu dute eta iragarpenak kontuan izanik neurriak hartu dituzte. Ez, ordea, guztiek.
Elurra kentzeko makinak, gainezka
Ertzainak eta udaltzaingoak saiatu dira zirkulazioa arintzen, baina ez da erraza izan. Elurra bota eta bota egin du goiz osoan zehar eta elurra kentzeko makinak lanean aritu badira ere, asko auto ilaretan harrapatuta gelditu dira.
Herri barruan ere gauzak ez dira askoz hobeto joan. Izotza zegoen eta zirkulazioa asko moteldu du horrek. Batzuk oinez egin behar izan dute gaur lanerako bidea. Beste batzuk iritsi ere ez dira egin.