The Wet Band, diskoa grabatzen Shot! estudioan

Buru-belarri ari dira The Wet Band taldeko kideak Arrasateko Shot! estudioan euren aurreneko lan luzea izango dena grabatzen. Danbaka musika lehiaketaren hirugarren edizioa irabazi eta diskoa grabatzeko aukera jaso zuten saritzat, eta 12 abestidun lana izango da emaitza. Ahotsa eta gitarra, baxu eta bateria doinuak jartzen dituzten lehengo lau kideei Endika Kerejeta saxofoi eta teklatu jolea batu zaie, eta Danbakan aurkeztu zituzten sei kantuei beste hainbeste berri.

Kantu berriak zaharrak baino gogorragoak dira, oro har, taldekideen esanetan. Soul, metal eta pop doinuak nahastuko dituzte, besteak beste, diskoan. Teklatuak lehengo kantuendako "koltxoi" bezala balioko omen du, oinarri moduan, "atmosfera sortzeko".
Saxofoiak, berriz, Ainara abeslariaren ahotsaren epeltasuna lagundu eta hari distira emango diola uste dute taldekideek. Ingelesez abestutakoak izango dira The Wet Banden diskoko kantuak, euskarazko bat izan ezik, eta gaiak eguneroko bizitzakoak, protestaren batzuk ere tarteko.