Izan aditzaren taula aukeratu dute aurten Gipuzkoako 17 udal euskaltegik matrikulazio kanpaina bateratua egiteko: hizkuntza ezberdinetan idatzia agertzen da eta euskarari Gu Gara egokitu zaio, modu azpimarratuan gainera. Arduradunen esanetan, aniztasun linguistikoan bizi garen herria garela adierazi gura izan dute kanpaina honekin, baina bide batez gure euskalduntasuna aldarrikatuz.
Aurtengo berrikuntzetako bat da, teknologia berrietaz baliatuz, sare sozialetan murgildu direla udal euskaltegiak, Twitter-en eta Facebook-en hain zuzen ere. asmoa da, euskara ikasi eta hobetu gura dutenen sarea handitzea.
Eskaintza akademikoa
Iaz bezala eskaintza zabala prestatu dute, norberaren maila, adin eta interesen arabera, eta etorkinendako prestatutako errefortzu ikastaroek eta Aisa programak ere jarraituko dute.
Lehen aldiz baina, laugarren maila eskainiko dute Debagoienean; EGA baino maila goragokoa da hau, euskaran sakontzea gura dutenentzat. Ikastaroak 150 ordu presentzial izango ditu, eta beste 15 tutoretzetarako. Udal euskaltegietako arduradunen esanetan, ikastaro hau administrazio publikoan ari direnentzat edo aritu gura dutenentzat da egokia, baita bere euskara maila hobetu gura duten irakasle, kazetari edo edozein herritarrentzat.
Matrikulazio epea
Udal euskaltegietan izen emateko epea zabalik dago dagoeneko. Arrasateko eta Leintz Udal euskaltegietan irailaren 25a arte egongo da matrikulatzeko aukera, Bergarakoan, hilaren 26a arte.
Informazio gehiagorako: www.udaleuskaltegiak.net