"Oso gustura gaude herritarrek emandako erantzunarekin", azaldu digu Iesbaa taldeko kide Olaia Sagredok, "hasieran uste genuen ez genuela iaz beste material bilduko, baina aurreikuspenak bete egin dira".
Antolatzaile taldeak, eskertu ditu kanpainan parte hartu duten guztiak, bereziki eskolen lana.
Dendetan eta eskoletan
Piztu Itxaropena kanpaina abenduaren 27an abiarazi zuten. Arrasateko, Aretxabaletako, Eskoriatzako, Oñatiko, Elgetako, Antzuolako eta Bergarako hainbat dendetan erosketarako orgak jarri ziren elikagaiak jasotzeko. Era berean, hainbat ikastetxetan, ikasleen bidez jaso zituzten elikagaiak. Guzti horiek kaxatan sartu eta zapatu goizean kamioetan kargatu zituzten.
Arrasaten kargatutako kamioetako materiala Bilbora eroan dute, Euskal Karabana otsailaren 16an Saharara abiatuko da-eta. Handik, Tinoduf-eko kanpamenduetara joango dira, hango lagunen artean materiala banatzeko.
Ekarpen bereziak
Sahararako elikagaiez gain beste ekarpen batzuk ere jaso dituzte elkartasun taldeek. Besteak beste, Arantzazuko eta Arrasateko fraideek eskolarako 80 mahai inguru eman dituzte. Etorkizunean, Saharako emakumeek erabiliko dituzte eskola batean. Gainera, laguntza ekonomiko publiko eta pribatua jaso dute eta diruarekin elikagai gehiago erosi dute.