LAB sindikatuak bat egin du gaur Euskal Herrian Ezker Abertzaleak deitu duen mobilizazio egunarekin. Joan den egueneko Batasunako mahai nazionaleko kideen atxiloketak salatzeko egin dituzte elkarretaratzeak.
Hezkuntza alorrean eta lantegietan ere bat egin dute deialdiarekin. Debagoienean ere hainbat elkarretaratze egin dituzte, tartean Bergarako San Martin plazan LAB sindikatuak eta Bergarako ikasleek egindakoa eta Eskoriatzako HUHEZI fakultateko ikasleek egindakoa.
Elkarretaratze jendetsua
Jendetsua izan da Bergarako elkarretaratzea. 12:00etatik 12:30ak arte egon dira bertan, LAB sindikatua Errepresiorik ez Euskal Herriak hitza eta erabakia zioen kartelarekin eta ikasleak, berriz, Independentziari ateak ireki, Gora Euskal Herria askatuta zioen beste kartel batekin.LABeko kideen arabera, "Espainiako estatuak aspalditik burutzen duen Ezker Abertzalearen kriminalizazio eta jazarpen estrategiaren barruan kokatzen da operazioa."
Adierazi dute "eragile politiko, sindikal eta sozialen aldetik erantzun zabala eman beharra dagoela, Euskal Herriaren aitorpena eta konponbide politikoak exijitzeko".