Lagun eta senitartekoek aramaioarrarekin bizi izandakoak gogoratu zituzten, baita hura espetxean den 28 urteotan euren bizitzetan zertzuk gertatu diren kontatu ere, eta 1981eko maiatzaren 11n Guardia Zibilak atxilotu zuenetik kartzelaz kartzela egin duen ibilbidea erakutsi zuten. Sakabanaketa politika, isolamendua eta jipoiak jasan behar izan dituela salatu zuten; baita zigorraren hiru laurdenak beteta izan eta osasun egoera larrian egon arren, kartzelan jarraitu behar izatea ere. Baina Agirrek guzti horri duintasunez eta nor den ahaztu gabe aurre egin diola gaineratu zuten. "Euskal Preso Politikoen Kolektiboa inoiz baino gehiago ari da jasaten gorroto politikaren ondorioak, baina gure herrietako plaza, ikastetxe, mendietan… ilunpea egunero argitzen dugu, ikasi dugulako hormak apurtzeko dinamitak baino indar handiagoa dutela maitasun keinuek eta eguneroko lanak", azaldu zuten.
"Espainiar Guantanamo"
Portaloira Topagunearen hitzetan, PSOE-k apustua garbia egin du Euskal Preso Politikoen Kolektiboa suntsitzeko: "Horrek ez du Guantanamo beste izenik, eta Jon Agirreren irudiak oso ondo erakusten du espainiar Guantanamoren neurria zein den". Baina "jazarpena" ez da espetxetara mugatzen, euren esanetan: "Presoekiko elkartasuna terrorismotzat jo, epaitu eta zigortu egin dute, baina elkartasun gehiagorekin erantzungo dugu".
Babesa eta berotasuna helarazi zieten Debagoieneko preso eta iheslari politikoen senideei.