Parte-hartzearen gaineko sarea sortu dute hainbat udalek eta Foru Aldundiak

Arrasate, Oñati, Bergara eta Aretxabaletako udalak Foru Aldundiarekin konprometitu dira Parte-hartzea kudeatuz izeneko sarea osatzeko eta garatzeko. Aurreneko biek Kudeatuz parte-hartze programaren lehen edizioan izan ziren, eta gainerako biak, bigarrenean.

Udal horietako ordezkariek, Foru Aldundikoek eta Kudeatuz programan parte hartu duten edo horretan diharduten beste 16 udaletako ordezkariek topaketa egin zuten eguenean Donostian, eta denek oso balorazio ona egin zuten euren esperientziaz.

Udal horiek eta Aldundiak erabaki zuten Parte-hartzea kudeatuz sarea sortzea, esperientziak eta ezagutzak partekatzeko. Gipuzkoako udalerri guztiei zuzendutako sarea izango da, eta datozen hilabeteetan, hura diseinatzeko eta hurrengo bi urteotarako lan plangintza zehatz bat antolatzeko konprometitu dira.

Sareak honako helburu orokorrak ditu: herritarren parte-hartzearen gainean norberak dakiena besteekin konpartitzea; gipuzkoarrek herri kudeaketetan parte hartzeko prozesuak ezartzea; hausnartzeko eta iritziak partekatzeko espazioak sortzea; herritarrengana hurbiltzea udal erakundeek euren gain hartu duten apustua herritarren parte-hartzea bultzatzeko; eta sarean egindako lanaren emaitzak beste udalerri batzuekin konpartitzea.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.