Ekimenei hilaren 6an eman zieten hasiera Zarautzen, surf ikastaroarekin. Arrasateko Udaixekoekin batera joan ziren hara; guztira, 36 neska-mutiko. Usakora bizikletaz egindako irteeran ere arrasatearrekin egon ziren. Aukeran bi ibilbide izan bazituzten ere, gehienak trenbide zaharretik joan ziren.
Uztailaren 9an, berriz, urteroko ekintza arrakastatsuenetarikoa egin zuten: Gamarrako igerilekura irteera. Guztira, 32 gaztek eman zuten eguna han. Eta hilaren 13an, aurtengo egitarauko irteera berria estreinatu zuten: Arabako Egino herrian izan ziren hamar gazte eskalada egiten. Antolatzaileen esanetan, "hasieran, izena hamabostek emanda bazuten ere, azkenean hamar joan ziren; gehienak neskak. Ikastaro laburra eta aditu baten azalpenen ostean, bide berria zabaldu zuten. Eguraldia lagun izan zuten eta egun ederra pasa zuten".
Egueneko kontzertu eta afari-meriendaren ondotik, egitarauaren ekimen nagusia iritsiko da, esan bezala, bihar: Laidako kanpinean lau egun emango dituzte.