Sara Vitoria psikologoa da eta berak azaldu digu opor osteko depresioa askotan guk geuk sortzen dugula eta autore askok diotela depresio hori berez ez dela existitzen. Sarak azaldu digunez "Errutinara bueltatzea beti da gogorra eta normala da horrek gugan eragina izatea baina berehala ohitzen gara berriz lanaren egunerokotasunera eta sentsazio hori aste betean desagertu egiten da".
Depresio edo ez, egia da eguneroko martxara itzultzea gogorra egiten dela eta hori ekiditeko gomendio batzuk eman dizkigu. "Komenigarria da oporretatik lanean hasi baino egun batzuk lehenago itzultzea. Etortzen garenean maleta desegin behar da, erosketak egin behar dira... eta hori guztia lanera itzultzearekin batzen bada gogorragoa egiten da itzulera hori. Oporrez hitz egitea ere komenigarria da. Askok eta askok itzuli orduko esaten dute ahaztu dituztela dagoeneko oporrak".
Lanera itzuli berri zareten guztiok, beraz, badakizue; jarrera positiboa izan, oporretako momentu onak gogoratu eta itzulera gogorra den arren lasai egon aste betean depresio deitzen diogun hori desagertu egingo da eta.