Hiru aste behar izan dituzte aklimatazio fasea burutzeko eta orain hiru edo lau egunetako aldeko eguraldi iragarpenaren zain daude Broad Peak mendateko hiru tontorrei aurre egin ahal izateko.
Elur sakona eta izotz asko
Esandako moduan, aklimatazio prozesua zaila izan da. Aste bukaera izan da bereziki konplikatua; halaxe azaldu du Mikel Zabalzak: "Hasieratik bidea zabaltzea egokitu zaigu eta elur sakona eta izotz asko aurkitu dugu. Gainera, eguraldia ez dugu lagun izan eta eta hirugarren gunera heldu ginenean –7.200 metrotara– atzera egin behar izan genuen haize bortitza zela-eta, 6.900 metroetaraino".
Hala ere, espero moduan joan da egokitze fasea, Alberto Iñurrategik azaldu duenez: "Hiru aste egin ditugu, hitzartu genuen moduan. Ezinbestekoa zen bi gau mendian pasatzea, horietako bat 7.000 metrora gutxienez. Orain deskantsua hartzea komeni zaigu azken hiru egunak oso biziak izan dira-eta".