Betidanik izan du oso lotura estua Mondragon Unibertsitateak enpresa munduarekin. Gainera, azkeneko urteetan lan handia egin dute ikerkuntzan; batez ere, ikerkuntza kolaboratzailean.
Horren harira, Mondragon Unibertsitateak eta Ingeteamek hitzarmena sinatu dute potentzia elektronikoari eta elektrotekniari buruzko zientzia eta teknologien ikerketa-gela sortzeko.
Altzairu ekonomikoagoa
Ikerketa-gela Garaiako kanpuseko eraikinean kokatuko dute. Gelan garatuko diren ikerketen onura zuzena hainbat aplikazio industrialek jasoko dute; adibidez, altzairua era ekonomikoagoan lortzeko balioko du. Bestalde, banaketa sareak era optimoan eta seguruan kudeatu ahal izango dira, eguraldi txarraren ondorioz sortu daitezkeen itzalaldiak ekidinez. Gainera, energia era garbiagoan sortu ahal izango da. Azkenik, ontzigintzaren sektorean propultsio seguruak eta ez- kutsatzaileak garatuko dira, eta trakzio eraginkorragoko trenak nola sortu ere ikertuko dute.
Unibertsitateak jarritako zuzendaria
Proiektuen arabera aukeratuko da ikerketa-gelan lan egingo duen pertsonala. Esan behar da, unibertsitateak jarritako zuzendaria izango duela gelak, eta jarduera guztiak zuzendu eta planifikatuko dituen arduraduna jarriko duela Ingeteamek.