Antzuolako Elay enpresan egin du geldialdietako bat Gipuzkoako diputatu nagusiak. Jose Ramon Guridi Berrikuntza diputatuarekin etorri da. Krisiaren aurkako planera 13 milioi euro bideratuko ditu diputazioak Gipuzkoan, eta hauetatik 2,3 izango dira 19 enpresak aurkeztutako 31 proiektutarako. Dirua arlo desberdinetako proiektuak laguntzeko izango da.
Enpresek jasoko dituzten 2,3 milioiez gain, beste milioi bat jasoko du Mondragon Unibertsitateak Enpresagintza Fakultateko Berrikuntza zentrorako. Eta azpiegituren alorrean, eta krisiaren aurkako planaren barruan, baita ere, Urretxu eta Antzuola arteko errepideari bultzada eman diotela eta obrak aurten hasteko urratsak egin dituztela adierazi du Olanok.
Enpresek, jasoko duten laguntzaren truke, zenbait inbertsio egiteko konpromisoa hartu behar izan dute. Inbertsio hauek 6 milioi eurokoak izango dira guztira.
Krisiari aurre egiteko planeko laguntzak horretarako bai, baina gehiagorako ere badirela adierazi du Guridik. Zentzu honetan, diputazioak aurreikusten du krisiaren aurkako planaren barruan beste bi milioi euro bideratzea enpresen eta produktuen nazioartekotzera.