Horrekin, zerbitzuaren erabiltzaileek egindako informazio eskaera betetzeaz gain, kartoia egun eta ordutegiz kanpo ateratzeak sortzen dituen eragozpenak saihestu nahi direla jakinarazi du Mankomunitateak.
880 tona kartoi
Bidaliko duen txartelean azaltzen du joan den urtean zerbitzu horren bidez bildutako kartoi kopurua lehen aldiz gutxitu zela. Aipatzen du iaz bizitako krisialdi egoerak bilketa horretan eragina izan zuela, zerbitzu horren erabiltzaile askok beraien aktibitatean murrizketak jasan zituztela, eta, bide batez, sortutako kartoi kopuru hondakin kopuruan igarri zela. Dena dela, gaineratzen du 2007koa baino altuagoa izan zela. Iaz 880 tona kartoi birziklatu ziren.
Egutegiari dagokionez, gogorarazten du Arrasate, Bergara eta Oñatiko herri guneetan, astelehenetik egubakoitzera jasotzen dela; Leintz Gatzagan, martitzenetan eta eguenetan; eta gainontzeko herrietan eta Arrasate, Bergara eta Oñatiko industriguneetan, astelehenetan, eguaztenetan eta egubakoitzetan. Ordutegia 20:00etatik 22:00etara da kasu guztietan.