Debagoienean 4 telebista lehian
Eskaera egin daitekeen barruti bakoitzean, gehienez, lau lizentzia banatuko dira. Gure ibarrean lau telebista daude lehian, baina horrek ez du esan nahi derrigorrez laurek lortuko dutenik lizentzia. Baimena lortzeko, puntuazio jakin bat lortu beharko dute.Hauexek dira aurkeztutako laurak:
Gipuzkoa Televisión S.L., (Prisa)
Grupo de Medios ausiovisuales de Gipuzkoa
KTB, Kate Berria, S.L (Vocento)
Goiena Komunikazio Zerbitzuak Kooperatiba
EAEn 81 proposamen onartuta
Euskal Autonomia Erkidegoan 37 enpresek aurkezturiko 89 proposamen jaso ditu Eusko Jaurlaritzak. Horiek aztertu ondoren, 33 enpresa eskatzaileren 81 proposamen onartu ditu. Hain zuzen, 81 horiek izango dira lizentziak eskuratzeko lehian parte hartuko duten telebista proiektuak EAEn.
Jokoan 60 telebista lizentzia daude. Plangintza Teknikoaren arabera, Araba, Bizkaia eta Gipuzkoa 15 barrutitan banatuta daude: Araban 2 barruti, Bizkaian 6 eta Gipuzkoan 7. Barruti bakoitzean multiple bana prestatu da, eta horietako bakoitzean lau telebista kate sartuko dira. Denera, beraz, 60 telebista katerentzat dago lekua.
Esleipena
Orain, lehiaketa publiko horren ardura Eusko Jaurlaritzak du, eta Kontratazio Mahaiak enpresen eskaintzak aztertuko ditu, eta espero dute ekainaren amaierarako prest izango duela Kultura Sailak esleipen proposamena. Jaurlaritzaren Osoko Bilkuran aztertu eta gero, jakinaraziko zaie lizentzia esleituko zaien enpresei. Lehiaketaren jakinarazpena behin eginda, enpresa irabazleek, jakinarazpenaren ondoko hamabost eguneko epean, behin betiko bermea aurkeztu beharko dute, eta hiruhilabeteko epea izango dute, proiektu teknikoa igortzeko.
Behin proiektu teknikoa onartuta, kontratua sinatuko dute enpresek eta administrazioak, eta hortik aurrera zerbitzu emaileek 18 hilabete izango dituzte emititzen hasteko. Lehenengo emanaldiak, beraz, 2008an hasiko dira.
Euskararen lekua
Telebista guztiek euskarari lekua egin beharko diote, eta Jaurlaritzak dio esleipen prozeduran lehentasuna emango diotela euskararen erabilerari, "zerbitzu emaileentzat emango diren bideragarritasun ekonomikoaren eta teknikoaren barnean". Udalek zuzenean kudeatuko duten telebistetan, gutxienez, programazio erdia euskaraz izan beharko du.