Tartean, lau debagoiendar daude: Itziar Astiazaran aretxabaletarra, farmazialaria; Mari Karmen Gallastegi bergararra, ekonomialaria; Jon Markaide elgetarra, astronomoa; eta Jesus Mari Ugalde bergararra, kimikari fisikaria. Hain zuzen, 26 adituen artean izen ezagun asko dago; besteak beste, honakoak: Bernardo Atxaga idazlea, Jabier Agirresarobe zinemagilea, Rafael Moneo arkitektoa eta Jesus Altuna antropologoa. Akademiako lehendabiziko lehendakaria izango da Pedro Miguel Etxenike fisikari ezaguna.
Helburu garrantzitsuak
Jakiunde akademiako kideak urtean hiru aldiz elkartuko dira osoko bilkuretan. Haien zeregina izango da elkarrekin hausnartu eta iritziak ematea; horretarako, gizartean antzematen dituzten gabeziak eta euskal letrek, zientziek eta arteek datozen urteetan hartu beharko luketen bidea hartuko dituzte hizpide. Ikerketak, azterlanak, txostenak eta irizpenak egiteko zeregina izango dute adituok.