Aurreko astean, bainua debekatuta egon zen bainugune baten, uretan salmonella bakteria aurkitu zutelako.
Kontuan hartu behar da, ordea, bainatzeko aukera egon arren, aukera mugatua dela: izan ere, uraren egoera kalifikatzeko hiru aukeratik –eskasa, balekoa edo ona–, Landako bi bainuguneetako urei balekoa eman diete, eta Osasun sailak gomendatzen du, gehienez ere, 10-15 minutuan egotea uretan, eta gero, dutxatzea.
Ur onena, garaion
Emaitza horiekin batera, Osasun sailak Arabako beste bi bainulekurenak jakinarazi zituen egubakoitzean. Hala, Landaren kalifikazio bera, balekoa, jaso du Zuatzako Uharteak, hura ere Arrazua Ubarrundiako udalerrian.
Kalifikazio onena Barrundiako Garaio urtegiak izan du: ura ondo dagoela esan du Osasun sailak, eta han, bainatzea guztiz libre da, gura beste denboran.