Landa Inguruneko Ideia eta Proiektu Berritzaileen sariketa antolatuta dute Deba Garaia eta Debemen Debagoieneko eta Debabarreneko Landa Garapenerako Elkarteek, eta bihar, martitzena, aurkeztuko dute aurtengo deialdia Antzuolako Olaran etxean.
Aurtengo berritasuna da, hain zuzen, bi agentziek batera antolatu dutela; aurretik, hiru edizio egin ditu Deba Garaiak bakarrik. Debabarrenean, lehenengo aldiz izango dute lehiaketa hori.
Helburua eta oinarriak antzekoak dira: hots, landa ingurunerako ideia eta proiektu berriak bultzatzea eta saritzea. 1.000 eta 500 euroko sari bana dago eta, lehenengoarendako, gainera, bere proiektua garatzeko beka egiteko 3.000 euro, aukeran.
Debarroa
Deba Garaia agentziako Mari Karmen Iturbek dioskunez, bi eskualdeetako agentziek daramaten Debarroa proiektuaren barruan dago deialdi hori. Proiektuak Debarroko herritarrak landarekiko sentsibilizatu nahi ditu, eta bi elkarteek egoki iruditu zioten lehiaketa ere batera egiteari.
Iturbek dioenez, "orain arte, proiektu kopuru egokia aurkeztu izan da, baina lehiaketari beste bultzada bat eman nahi izan diogu eta Debarro osora zabaldu, ea jende gehiago animatzen den". Aurten, lehengo oinarri berberekin egingo dute, eta, zelan irteten den arabera, pentsatuko dute berritasun gehiago egin.
Agentziak proiektu irabazleari beka eskaintzera eta, dena garatuta badago, egi bihurtzen laguntzera konprometitzen dira.