Kultura Sailak guztira 5.750.000 euro bideratuko ditu euskarazko hedabideak laguntzeko, iazko deialdian baino % 17,4 gehiago. Hazkundea ia atal guztietan aurreikusi badute ere, hazkunde horren zati nagusia euskara hutsezko hedabide idatziei dagokio. Igoera horren onuradun nagusiak, dena dela, herri aldizkariak izango dira, aurten 2006an baino 342.000 euro gehiago bideratuko dituztelako tokiko aldizkarientzat. Tokiko informazioa jorratzen duten egunerokoek ordea, aurten ez dute igoera nabarmenik izango.
Eskaeratik urrun
Hala ere, orokorrean euskarazko prentsan aurten izango den hazkunde ekonomikoa, urrun geratu da euskarazko hedabide idatziek Eusko Jaurlaritzari eginiko eskaeratik. Urrats berriak emateko eta orain artean emandakoak sendotzeko, Jaurlaritzari egungo diru laguntza milioi bat eurotan handitzeko eskatu diote.
Interneteko hedabideena bikoiztu
Horretaz guztiaz gain, aipagarria da Eusko Jaurlaritzak iaz eman zuen diru laguntzaren kantitate bikoitza jasoko dutela aurten Interneteko hedabideek.
Eskaerak aurkezteko hilabete
Orain, interesa duten hedabideek hilabeteko epea dute eskaerak aurkezteko. Eskaera guztia jaso eta aztertu ondoren zehaztuko du Kultura Sailak komunikabide bakoitzari dagokion diru laguntza. Elkarteek eta enpresek urtearen lehen erdian jakingo dute zein diru laguntza jasoko dute.
Deialdi osoa duzue hemen.