Mundukideren programaren helburua da azukrearen industriak laga duen hutsunea betetzea; horretarako, abeltzaintzara eta nekazaritzara bideratuko dituzte lehen kanabera lantzen zituzten lursailak eta azukrearen industrian lan egiten zuten langileak eta guneak. Proiektu horrek, gainera, bat egiten du Kubako gobernuaren elikagaien subiranotasunaren printzipioarekin edo helburuarekin.
Kuban zeuden 170 azukre lantegietatik erdiak baino gehiago itxi egin behar izan dituzte eta gaur egun daude 80 bakarrik.
Kooperatibismoaren antolaketa eta kudeaketa era Kubara egokitzea da helburua. Horretarako, besteak beste, ekintzaileendako Saiolanen antzerako ekimena jarri nahi dute abian Kuban.
Programa horrekin lotuta, 13 kubatar Debagoienera etorri dira; urri bukaeratik daude gurean formazioa jasotzen, Arrasateko Eskola Politeknikoan. Abenduaren 2an itzuliko dira Kubara. Etorri direnetatik bost dira Azukrearen Ministerioko kideak; gainerakoak azukrearen sektorearekin lotutako jarduera ekonomikoetako kudeatzaileak.
Formazioa jasotzeaz gain, inguruko kooperatibak ere bisitatu dituzte, horietako gehienak lehen mailako produktuekin eta jakiekin lan egiten duten enpresak. Lehen sektoreak Euskal Herrian zela lan egiten duen ezagutzeko, bestalde, hainbat baserri bisitatzeko aukera ere izan dute. Amaia Uribetxeberria eskoriatzarra eta Mundukideko kidea da proiektuaren arduraduna Kuban.