Bidaia intimoak
Izen hori daukan dokumentala estreinatuko da zapatuan euskara ikasi eta zabaldu duten etorkinei omenaldi modura. Kanpora joan barik ere "frankismoaren edo frantses estatuko lege jakobinoen erruz, euskara galdu duten familiak" eta haiek hizkuntza berreskuratzeko egindako lana ere eskertu gura dute Korrika 16-n. Antolakuntzatik honela azaltzen dute filmaren muina: "Dokumental honen protagonistak euskaraz bizi nahi dugunon herrira etorritako lau pertsona dira, Korrika 16ren omenaldi beroa merezi duten milaka eta milaka lagunen ordezkari gisa hartutakoak. Hala, Mixele, Rami, Jesus Mari eta Tereixaren bizitzetan euskaldun asko eta asko identifikatuta sentituko direla uste dugu, beraiek euskaraz bizi nahi dugunon herrira egindako ibilbidea milaka lagunek egin dutenaren antzekoa izango baita ziur aski". Mixele nagusitan euskara berreskuratu eta egun AEKko irakasle den lapurtarra dugu, Rami Aljeriako etorkin Goizuetarra, Jesusu Mari, ermuarra, nagusitan euskara ikasi zuena eta Tereixa, ostera, galiziarra dugu, Bilbora lan bila etorritakoa. Jon Maia da filmaren egilea. Zapatuan, Euskalduna Jauregian estreinatuko da arratsaldeko 19:00etan.
Ongi etorri, Debagoienera, azken egunean
Eta Bergarako hitzorduaren ondoren debagoiendarren ordua apirilaren bostean bertan izango da, Korrika 16-ren azken egunean. Bergarara iritsiko da lehengo eta hortik Antzuolara. Gipuzkoara itzuli eta Legazpikoei lekukoa hartuko dietenak oñatiarrak izango dira, Leintz Bailarekoak ostean eta Ullibarri Ganboatik barrena helduko da lekukoa azkenik Gasteiza. Martxoaren 26an hasiko da Korrika 16.
Beroketa lanekin hasteko, bideoklipa: