Kilometroetako 31 edizioetako logotipoen erakusketa izango da ikusgai Bergarako Aroztegi aretoan apirilaren 19tik maiatzaren 2ra arte.
Erakusketa eguen honetan, hilak 19, zabalduko da 19:00etan.
Kilometroak antolatu dituzten 31 ikastolek prestatu dituzte logotipoak euskarri ezberdinetan eta horiek izango dira ikusgai. Hain justu ere, ikastola horietako DBHko maila ezberdinetako ikasleek prestatu dituzte artelanak.
DIN A2 formatua izango dute logotipook. Teknika eta material ezberdinak erabili dituzte egiteko: pinturak, collage-ak…
Bergaran antolatutako kilometroetako (1991 eta 2007) logotipoak nabarmendu egingo dira: landuagoak eta neurri handiagokoak izango dira. Oso erakusketa plastikoa izango da.
Lan bakoitzak informazioa izango du alboan: erreprodukzio originala, zein urtekoa den, zein herrikoa, erabilitako leloa...
Bestalde, bitrina batean Kilometroetako lekukoa egongo da ikusgai.
Musika eta hitzaldia
Musika ere ez da faltako: Kilometroetako edizioetako abestiak entzungo dira erakusketa aretoan.
Erakusketa inauguratzearekin batera, apirilaren 19an, eguena, 19:30ean, berbaldia egingo du Josu Erguin Kilometroetako asmatzaileak.