Zapatuan, apirilak 10, Bergarara egindako bisitan egin zion jakinarazpena Donostiako gotzain Jose Ignacio Munillak. Kargua onartuta, Donostiara joango da bizi izatera udan; Bergaran jarraituko du ordura arte. Bizitokia aldatzearekin batera, Bergarako Santa Marina eta San Pedro parrokietako, Elosu auzoko eta Antzuolako parroko izateari utziko dio: "Beste bat, gutxienez, aurkitu beharko dugu zeregin horietarako" adierazi dio Goienari.
"Burua, lehengo lepotik"
Juan Kruz Mendizabalek (Ormaiztegi, 1964) aitortu digu "urduri" dagoela eta "kokatzen" dabilela egunotan, "aldaketa handia" izan delako epe laburrean. "Lehengo lepotik daukat nik burua, eta uste dut horrekin duela zerikusia ni aukeratu izanak, egoera honetan kontraste bat izan naitekeelako" esan digu.
Izendapen honekin, Munillak amaitu du Donostiako Elizbarrutiko lan taldea osatzen. Joseba Gonzalez (Azkoitia, 1969) aukeratu du Bikario Nagusi.