Udako Argazkien Asteleheneko Goienkaria IV. lehiaketan 135 lagunek parte hartu dute. Guztira, baina, 447 argazki jaso ditugu, lehiakide bakoitzak bost argazki bidaltzeko aukera zuen-eta.
Aukeraketa egitea ez da batere erraza izan epaimahaiarendako: "Buelta mordoa eman dizkiogu argazki bakoitzari, asko dira-eta saria merezi dutenak. Batzuk freskoak direlako, besteak barrea eragiten dutelako... Saridunak aukeratzea zaila izan da". Horren harira, azaldu du teknika aldetik zainduta daudenak jaso izan direla. Goienako kideek eta Bergarako Kiñu argazki dendakoek osatu dute epaimahaia.
Sariak
Saridunek asteon jasoko dute saria. Lehenengoak, Jose Ramon Txintxurretak, Olympus E-510 reflex argazki kamera digitala irabaziko du, Bergarako Kiñu argazki dendaren eskutik. Xabier Arabaolazak aste bukaera bateko egonaldia jasoko du, Arrasaten Bidaiak-en eskutik; eta Mireia Lizarraldek, berriz, Leintz Gatzagako Gure Ametsa jatetxean bi pertsonendako afaria edo bazkaria.
Lehenengo saria: Olatuak
Itsasoa bare Zumaiako hondartzan. San Telmotik abuztuko goiz eder batean ateratako irudia. /Argazkia: Jose Ramon Txintxurreta/Oñati
Bigarren saria: txalupa
Islako txalupa zahar honek gozatzen duen egunsentietako bat. Argazki hau abuztuan Islan ateratakoa da.. /Argazkia: Xabier Arabaolaza /Oñati
Hirugarren saria: Karakola
Karakolen antzera gu be etxia bizkarrian hartu eta Pontevedrara juan giñen hango itsasertzeko ilunabar goxuez gozatzera... /Argazkia: Mireia Lizarralde /Bergara