Jakioneko gerente Susana Aiastuik azaldu digu horren gaineko aurreproiektua garatzen dihardutela orain eta urtea amaitu baino lehen amaituta izan nahi dutela: "Betiko filosofia mantenduz proiektua egiten gabiltza. Besteak beste, planta berriaren azalera eta kostua, zenbat langile eta baserritar behar ditugun, merkatua zabaltzeko dauden aukerak eta hori atera ahal izateko eska daitezkeen laguntzak aztertzen gabiltza. Behin betiko erabakia oraindik hartu barik dago".
Kokapena, Gatzagan
Aipatu du asmoa dela instalazio berriak Leintz Gatzagan eraikitzea. Aiastuiren esanetan, "hasieratik herrian apustua egin zen Jakion hemen kokatzeko. Bestalde, baserriarekin duen lotura ere kontuan dugu. Ez da berdina horrelako enpresa bat Gatzagan edo Arrasaten jartzea; azken horrek industriarekin lotura handiagoa dauka". Dena den, ez dute baztertzen bailarako beste herri batean kokatzea.
Jarduera berriak
Fruta eta barazkiak kontserbatan egiten jarraitzeaz gain, lehen sektoreari lotutako jarduera berrietan sartzea ere aztertzen ari dira. Karakolak kontserban saldu nahi dituen Etxarriko enpresa batekin daude harremanetan; baita Lumagorrikoekin ere, salda egin nahi dute-eta horiek. Horietaz gain, ardiak dituztenekin ere harremanetan daude, gaztandegia jartzeko aukera aztertzen.
Aiastuik azaldu du, horren harira, oraingo instalazioetan ezin dituztela animaliak sartu: "Planta horretan linea berria sartu beharko genuke; hain justu ere, animalietatik produktuak ateratzekoa. Komeni da proiektua ahalik eta zabalena izatea, administrazioetara laguntza eske joaterakoan horrek pisu gehiago izateko".
Ibilbidea
1996. urtean sortu zen Jakion, Debagoieneko baserrietako fruta eta barazkiekin eskuz eta modu naturalean produktuak gertatzeko sortutako enpresa da; hain justu ere, ekoizpenari irtenbidea emateko baserritarrek sortutako elkartetik sortu zen. Bailarako zortzi udalak enpresako bazkide dira.
Hasieran marmeladak gertatzen hasi baziren ere, laster produktuen eskaintza handitu egin zuten. Gaur egun, 30 produktu inguru dituzte; porru-krema eta kiwiarekin egindako menbrilloa dira berrienak.