Eskoriatzako proiektuaren bidez, herriko iparraldeko eta hegoaldeko bidegorriak lotuko dira, gehiegizko aldaparik gabe. Hilerriaren azpitik doan 200 metroko antzinako trenbide-tunelaz baliatuko da trazatua. Tarte horren luzera txikia da, 300 metro baino ez ditu. Construcciones Mariezcurrena enpresa egiten ari da lan horiek, 797.572 euroren truke. Diputazioaren aurreikuspenen arabera, uztailaren hasierarako amaituko dute.
Soraluze-Mekolalde tarteari dagokionez, zorua egokituko dute eta, Soraluzetik hasita, 4 kilometroko luzera duen zatia argiztatu egingo dute. Proiektuko lanak Campezo Construccion enpresari adjudikatu dizkio Diputazioak. Lanon aurrekontua 876.900 euro da eta irailaren hasierarako horiek amaituta egotea da asmoa.
Bergaratik irten barik, beste tarte bat egokitzen hasi zen joan den astean Dunboa enpresa. Bergara-Antzuola zatiko lehenengo eta bigarren faseko trazatuak 1,52 kilometroko luzera du eta aurrekontua 675.960 euro da. Uztailaren hasierarako bidegorri zati hori funtzionamenduan egotea espero dute.
Likideziarik eza
Diputazioko Garapen Iraunkorreko Departamentuko Beatriz Martikorenak bidegorrien lanek izandako atzerapenaz hitz egin digu: "Obrak geldi egon dira likidezia falta egon delako. Lanak esleituta bazeuden ere, ezin izan ditugu hasi dirua lortu arte".
Bestalde, Martikorenak esan digu Oñati-Zubillaga eta Zubillaga-Epele zatien proiektuak dagoeneko eginda daudela eta laster, esleitzeko prozesuarekin hasiko direla. Horren harira, aipatu du aurten adjudikatuko dituztela.
Ezaugarriak
Bergara-Antzuola. Luzera: 1,52 km. Aurrekontua: 675.960 euro. Enpresa: Dumboa. Lanen iraupena: 5 hilabete.
Soraluze-Mekolalde. Luzera: 4 km. Aurrekontua: 876.900 euro. Enpresa: Campezo. Lanen iraupena: 6,5 hilabete.
Eskoriatza-hilerria. Luzera: 300 metro. Aurrekontua: 797.572 euro. Enpresa: Mariezcurrena. Lanen iraupena: 5 hilabete.