Irungo eta Urnietako langileek behargin guztien lan baldintzak parekatzea eskatzen diote zuzendaritzari, baina alde biak ez dira adostasunera iritsi, momentuz. Hilabete da lanuzteak hasi zituztela eta egoera horrek 20.000 gidariri eragin die dagoeneko, urrunagoko azterketa lekuetara joan behar izan dutelako, isunen beldurrez.
Bergarakoa da, uneotan, Gipuzkoan zabalik dagoen bakarra
Uneotan, Gipuzkoan, Bergarako IAT gunea bakarrik dago zabalik, hura beste enpresa batek kudeatzen baitu, eta azken hilabetean lanez gainezka dabiltza, ia hamar eguneko itxarote zerrendarekin. Atzo, martitzena, eta gaur, eguaztena, eguerdiko hamabiak baino lehen deitutakoei, esaterako, hilaren 21erako eman diete txanda.
Irungo eta Urnietako langileen protesta da itxarote zerrenda luzatu izanaren arrazoietako bat, baina Bergarako gunetik adierazi digute urte sasoi honetan –Gabonetako oporretatik bueltan–, ohikoa izaten dela lan asko izatea.