Ibarreko odol emaileen festa izango da domekan Elgetan. Festa baino gehiago izango da; izan ere, esker ona adieraziko zaie urtetan, borondatez, odola eman dutenei. Debagoieneko –Arrasate, Aretxabaleta eta Eskoriatza izan ezik–eta Debabarreneko odol emaileak elkartuko dira; guztira, 190 lagun.
Meza izango dute lehenengo
Eguerdiko hamabietan elkartuko dira omenduak Elgetako parrokian. Ondoren, 13:30ean, Espaloian intsigniak eta diplomak banatuko dituzte. "Banatuko dizkiete zilarrezko diplomak 25 odol emate egin dituztenei; eta urrezkoak 50 odol emate egin dituztenei", azaldu du Mari Asun Agirre antolatzaileetako batek. Esan behar da 40 odol emate egin dituzten emakumeek ere urrezko diploma jasoko dutela. Horiez gain, baina, odol emaile bikainak ere omenduko dituzte; hau da, 75 aldiz odola eman duten herritarrak.
Urrezko diplomak jasoko dituzte 60 lagunek, zilarrezkoak 113 lagunek eta berezia 17 lagunek. 17 lagun horietatik lau antzuolakoak dira, hiru Bergarakoak eta bat Oñatikoa.
Bazkaria espaloian
14:30ean bazkaria izango dute Elgetako Espaloia Kafe Antzokian. Menua hau izango da: urdaiazpikoa, bakailao entsalada epela eta era askotariko frijituak, txekor matrailak saltsan, tarta izozkiarekin, kafea eta kopa.
Iaz ere Elgetan egin zuten odol emaileen festa. Giro bikainean pasa zuten eguna, eta aurten ere hori espero dute