Alpha Blondyk jendetza erakarri bazuen ere, ondo baino hobeto berotu zioten plaza aurretik jo zuten Revolutionary Brothers anaia donostiarrek, euren reggae sound systemarekin. Giro ezin hobea plazan eta janari eta edari postuak ilada luzeekin; leku guztietan jendea ikus zitekeen atzo Bergaran. Lehenengo egunetik beraz erabil genezake arrakasta berba.
Baina harrera ona ez zuten gaueko ekintzek bakarrik izan atzo. Azoka zabaldu zuten unetik, jendearen joan-etorria etengabea izan zen. Horrez gain, Tandarica Orkestarrekoek, esaterako, kaleko ume eta nagusi guztiak aztoratu zituzten euren zirko ibiltari ikusgarriarekin eta horien ostean kaleko giroa berotzearen lekukoa Salam! kalejirakoek hartu zuten txotxongilo eta txantxekin.
Atzoko beste protagonistak, baina etxekoak izan ziren. Oreka TXkoek ikuskizuna estreinatu zuten. Nömadak TX
film arrakastatsua formatu berri batera moldatu dute. Frontoian iglu puzgarri handi bat ipini dute. Barruan indiar tipi itxura hartzen du lekuak eta ikusleak borobilean jesartzen dira txalaparta kontzertua entzun eta filmeko irudiak ikusteko. Gaur eta bihar ere egingo dituzte kontzertuak (18:00etan gaur eta 11:00etan bihar).
Gaurko ekitaldiei dagokienez, Open boulder txapelketa egongo da arratsaldean eta kaleak animatzen Laboratorio de Samba, Alkora taldearen perkusioak eta Cairoko dantzariak ibilko dira. Gauen Tasha's World, 08001 eta Floro dj-ak jardungo dute.
