Hizkuntza eta herrien arteko II. truke programa aurkeztu dute

Oñatin aurkeztu dute Garabide elkarteak antolatutako hizkuntza eta herrien arteko II. truke programa. Programa honen helburua, euskara eta euskal kulturaren garapenaren esperientziak erakustea da, bereziki, garapen bidean dauden herrietako hizkuntza komunitate gutxituei. Gaur arratsaldean, Eskoriatzan, ongi etorri jaia egingo dute 18:00etan.

Lau astez, Ameriketako hainbat herri indigenetako ordezkariak gonbidatu dituzte gurera. Ibarrean izango dira, Guatemalako mayen ordezkariak; Ekuadorko kichwuak; Bolibiako kechwa, kayawalla eta aymarak; Txile eta Argentinako Wallmapu herriko maputxeak; Paraguaitik datorren guarania; eta, baita Magrebetik etortzekoa den amazigh herriaren ordezkaria.

Hizkuntza gutxituen arteko sarea

Truke programa da; horregatik, herri indigenetako ordezkariek ekarriko dituzten esperientziak ezagutzea izango da beste helburu bat. Gainera, hizkuntza gutxituen herrien arteko sarea sortu gura da. Era berean, iaz hasitako programei jarraipena eman gura diote. Iaz, bi programa jarri zituzten abian: telebista kitxua Ekuadorren eta UNIBOL proiektua Bolibian.

20 erakunde

Aurtengo, programa oso zabala prestatu dute. 20 erakundetik gora bisitatuko dituzte eta 40 ordu inguruko formazio espezifikoa jasoko dute parte hartzaileek. 

Gazteengana hurbildu

Berrikuntzak ere izango dira. Errealitate katalana ezagutzeko aukera egongo da eta proiektua gazteengana hurbiltzeko ahaleginean, hainbat ikastetxe eta Bergarako gaztetxea bisitatuko dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.