Iaz amaitu zitzaien indarrean zuten hitzarmena eta berria sinatzeko aukera ikusi dute orain. Ordutegiak murriztea eta soldatak duintzea eskatzen dute.
Estatuko hitzarmena
Gipuzkoako Merkataritza Orokorreko hitzarmena ez da 2002tik berritu eta Gipuzkoan aplikatzen den hitzarmena estatukoa da. Gainera, enpresa bereko Bizkaiko lurrindegietan askoz baldintza hobea dute.
Soldatak
Dapargel enpresako Gipuzkoako saltzaileek 10.074 euroko soldata dute urtean. Bizkaikoek, berriz, 2004ko hitzarmenaren arabera, 12.792 eurokoa. Lanaldietan ere desberdintasuna dago. Gipuzkoan 1792 ordu eta Bizkaian 1756. Soldata horrekin, babes ofizialeko etxebizitza bat eskuratzea ere ezinezkoa zaiela salatzen dute. Izan ere, ez dute gutxiengo soldataren baldintza betetzen. ELA sindikatuarendako onartezina da egoera hori. Enpresa berdina izanik eta Bizkaian eta Gipuzkoan bizi-maila berdintsua izanik ez dute langileen arteko desberdintasuna onartzen.
Akordiorik ez
Langileek zuzendaritzari eskatu diote berezko negoziazio esparrua irekitzeko; eskaera hori egin zutenetik hilabete pasa da eta oraindik ez dute akordiorik sinatu.