Harremaneko Sole Ibabe eta Teresa Haran kideek dioten moduan, "guk ez baditugu produktu horiek erosten, herrialde txiroetako ekoizle horiek ez dute jaten". Orain arte, lortu dute bidezko merkataritzako kafea leku batzuetan sartzea –Fagor Arrasate, Ikerlan, Dikar…– baina zabaldu egin nahi dute. Izan ere, Euskal Herriko beste leku batzuetan oso ohikoa da konpromiso hori: Bilbon, Donostian, Gasteizen… erakunde publiko guztietan elkartasun kafea ematen dute. "Bailarako udalek badute konpromisoa, bai, baina hori indartu nahi dugu". Europan ere oso ohikoa da erakunde publikoek horrelako ekintzak egitea.
Harreman dendan ere bai
Makina horietan ipiniko luketen elkartasun kafea Honduraskoa eta Perukoa da. Arrasateko Hiper Eroskin dagoen Harreman dendako makinan 35 zentimo kostatzen da.
Bidezko merkataritza orokorrean berpiztu nahi dute Harremanekoek, eta orain aurkezten duten ekimena hasierako pauso ona izan daitekeela uste dute.