Alderdi politikoei protesta
Bestalde, aurreko eguenean, AHT Gelditu! elkarlanekoek kontzentrazioa egin zuten Arrasaten "AHT proiektua babesten duten alderdi politikoen aurka". Kontzentrazioa Alderdi Sozialistaren egoitzaren aurrean egin nahi bazuten ere, Ertzaintzak ez zien utzi eta Arbolapetan egin behar izan zuten.
AHT Gelditu! Elkarlaneko Mila Elortzaren arabera, egiten dabiltzan kontzentrazio eta manifestazioen bidez gura du bultzatzaileei salaketa egitea, " alderdi politikoak direlako honen guztiaren bultzatzaile eta arduradunak". Bestalde, AHTren lanak gure ibarrean egoera ezberdinean daudela azaldu zuen: "Gatzagan hasi eta Arrasate arte doan zatia Espainiako Gobernuaren esku dago; Bergara-Antzuola zatia Jaurlaritzaren ardurapean dago. Jaurlaritzaren esku dagoen tartean oraindik ez dago oinarrizko proiekturik eginda, idazten ari dira; Estatuaren esku dagoen zatian, Eskoriatzan adibidez, desjabetze akten sinadura saiakera bi eginda daude eta Aramaioko tartea ere egoera berean dago; Arrasatekoa ere antzera". Aldi berean, adierazi zuen Arrasate eta Angiozar arteko tartean orain amaitu zaiela epea oianrrizko proiektuari alegazioak egiteko, eta orain, proiektu eraikitzailea egiten dutenean, alegazioak aurkezteko aukera izango dutela.
Krisiaz baliatuta
"Krisi ekonomikoaz baliatuta nahi dutena da hainbat lekutan AHTren lanak hasi eta aurrera eramaten ahalegintzea, dakitelako ez dagoela dirurik; horregatik hasi dira puntu ezberdinetan lan horiekin", azaldu zuen Mila Elortzak.