Euriari, behe-lainoari eta hotzari aurre eginaz, jende dezente bildu zen Danbaka musika lehiaketako bigarren kontzertu sorta ikusteko. Lagunak, familiakoak, edo besterik gabe musika maite eta talde ezezagunak ezagutzera joandakoak; Elgetako Espaloia Kafe Antzokian giro polita sortu zen.
Aitor Sologaiztoa bakarlaria eta bere NI_Neu proiektua izan zen taularatzen lehena, eta eibartarraren ostean, Debagoieneko hiru talderen txanda izan zen. Aretxabaletako Scam taldeak aurreko edizioan ere hartu zuen parte, eta atzokoan erakutsi zuten aurten finalera behintzat heltzeko gogoz daudela. Ondorengo bi taldeak Bergaratik hurbildu ziren: Lord Witcheko mutilak eta euren heavy metal landua, eta gauari amaiera emateko, Adi Holdenen doinu gogorrak.