Hego-mendebaldeko haizearen presentzia sumatu da goizean, baina bere indarrak ez du aparteko arazorik eragin, ez behintzat Debagoienean. Aurreikuspenak betetzen badira, ordea, haize bolada gogorrak izango dira ondorengo orduetan eta baita bihar, eguaztena, ere. Haizearen abiadura 80 eta 100 kilometro ordukoa izatera iritsi daiteke gaur eta 120koa, bihar.
Gomendioak
Hori dela eta, haize bolada indartsuen aurrean nork bere burua babesteko, hainbat gomendio helarazi nahi dizkie herritarrei Eusko Jaurlaritzako Larrialdiei Aurregiteko Zuzendaritzak: itxi leihoak eta pertsianak, eta kendu loreontziak, esekitako gaiak edota bestelako objektuak leiho eta balkoietatik; autoarekin saihestu kostaldeko bideak, zubiak eta haizeguneak; ez egin ur kirolik; eta ez ibili zuhaitzen eta eraikitze lanetan dauden eraikinen inguruan.
Bost metroko olatuak
Haizearen indarrak eragina izango du, noski, itsasoan ere: litekeena da bihar hiru metro t’erdiko olatuak izatea eta iluntzean bost metrokoak. Kostaldera hurbilduz gero, beraz, paisaia ederraz gozatzeko aukera izango duzue, baina, ez uretara gehiegi gerturatu.
Istripurik izanez gero, deitu 112 SOS Deiak-era.