Gurasoak aldizkaria elebiduna da eta guztira 5.500 ale banatuko dira. 0-5, 6-11 eta 12-18 urte bitarteko haurren inguruko gaiak lantzen dira. Lehen zenbaki honetan kanabisaren inguruko artikulu interesgarria jasotzen da. Doakoa da.
Gurasoak izeneko aldizkaria eskualdeko udalek bultzatutako proiektu berria
da. Aurrez Arrasaten eta Bergaran argitaratu izan diren Gertutik eta Aurrera Begira aldizkariak osatzera dator, eta eskualde osora zabalduko da.
Prebentzioa
Proiektu honekin prebentzioaren arloan pauso bat gehiago eman nahi da. Gurasoak aldizkariak seme-alaben heziketan lagungarria izan daitekeen informazioa helarazi nahi die gurasoei, besteak beste, garapen pertsonala sustatzeko gaiak, edo gurasoen hezitzaile lanean eraginkorrak izateko baliagarriak izan daitezkeen hainbat estrategia.
Aldi berean, gurasoen partaidetzari ateak ireki nahi zaizkie. Seme-alaben heziketaren gainean izan ditzaketen zalantzak eta kezkak argitzeko tresna erabilgarria izatea da helburua.
Hiru adin-tartetan banatuta
Gurasoak aldizkaria 0-18 urte bitarteko seme-alabak dituzuen gurasoei zuzenduta dago. Informazioa hiru adin-tartetan banatuta dago: 0-5 urte, 6-11 urte eta 12-18 urte. Horretaz aparte, honako atalak ditu: prebentziorako materialari buruzko aipamenak, gurasoen galderak (horretarako posta elektronikoa dago), adituei egindako elkarrizketak, bailarako udaletan gurasoentzat antolatuta dauden ekintzak eta, bukatzeko, gogoetarako gai orokor bat.
Udalek bultzatuta
Gurasoak aldizkaria bultzatu duten udalak dira: Antzuola, Aretxabaleta, Arrasate, Bergara, Elgeta, Eskoriatza eta Leintz Gatzaga.