Udalen egoera ekonomiko estuari laguntzeaz gain, bi helburu bete nahi dituztela adierazi du Zapaterok udalei laguntzeko emango dituen 8000 milioi euroekin: batetik, azken hilabeteotan lanik barik geratu den jendea enplegatzea, eta bestetik udalek planifikazio eta exekuzio azkarreko lanak egitea bestetik.
Udalei emango zaizkien laguntza hauek, biztanleriaren arabera banatuko dira; hala, Debagoienean, Arrasatek jasoko du diru gehien, eta Leintz Gatzagak berriz gutxien. Hauek dira herri bakoitzak gehienez jasoko dituen laguntzak:
Herria |
Laguntzak |
---|---|
Arrasate | 3.914.272 euro |
Bergara |
2.613.497 euro |
Oñati |
1.903.686 euro |
Aretxabaleta | 1.160.866 euro |
Eskoriatza | 700.520 euro |
Antzuola | 375.392 euro |
Aramaio | 264.243 euro |
Elgeta | 186.015 euro |
Leintz Gatzaga |
44.247 euro |
DEBAGOIENA | 11.172.738 euro |
Finantzatuko diren lanek, hainbat baldintza bete beharko dituzte: Udalek urtarrilera arte izango dute proiektuak aurkezteko aukera, eta lanak datorren urteko apirilaren 13a baino lehen hasi beharko dira. Honetaz gainera, bertako langileak langabezian daudenak izan beharko dira.
Espainiako Gobernuak laguntza osoaren %70 aurreratuko du, eta gainerako %30, lanak bukatzen direnean. Honetarako epea 2010ko lehengo hiruhilabetekoa izango da. Proiektuek ezingo dituzte lanak zatitu, eta bakoitzaren gehienezko aurrekontua 5 milioi eurokoa izan beharko da.
Alderdi Popularraren eskaria
Laguntza hauen harira baina, eta Inazio Uria enpresari azpeitiarraren kontrako atentatua dela eta, Alderdi Popularrak eskatu dio Zapaterori ez emateko diru laguntzarik Eusko Abertzale Ekintzaren zerrendetan joandakoek agintzen duten Udalei.
Horren partez, herri horiei dagozkien laguntzak Foru Aldundiek kudeatzea proposatu dute. Eskaera honek aurrera egingo balu, Debagoieneko bost herriri eragingo lieke: Arrasate, Bergara, Eskoriatza, Antzuola eta Aramaiori hain zuzen ere.