Inazio Uria Mendizabal, Altuna y Uria enpresako arduradunetakoa tirokatu dute eta hil egin da gaur (asteazkena) Azpeitian. DYAk baieztatu du heriotza, 13:52an. 13:03an izan da atentatua eta osasun zerbitzuek bertan artatu dute; 40 bat minutura utzi diote biziberritze lanei.
Bi ezezagunen aldetik, bi tiro jaso ditu Uriak: bat buruan eta bestea bularrean. 71 urte zituen eta azpeitiarra zen. Ez zeraman bizkartzainik.
Azpeitiko eraikuntza enpresako egoitzatik irten ostean jaso ditu tiroak, DYAk jakinarazi duenez. Loiola auzoan izan da atentatua, Kiruri jatetxe ondoan. Ordu horretan Kiruri jatetxera joaten zen Uria, jokoan egitera, jatetxeko kide baten arabera.
Ertzaintzak esan duenez, atentatu egileek erabili duten autoko jabea Itziarko (Deba, Gipuzkoa) gainean topatu dute, eskuak lotuta.