Etxetik gertuko eredua erabili zuen atzoko aurkezpenean Markel Olano diputatuak sarean Gipuzkoak erakuts dezakeen giharra azaltzeko. Fagor bera alor industrialean puntako enpresa den moduan, esan zuen txikia izanda ere indarra erakutsi dezakeela euskal sareak. Hain zuzen, etxetik hasi eta Olanok Diputazioaren kultur kudeaketan eta politiketan aldaketa iragarri du. Aldundiak artxiboak partekatuz ekingo dio eraldaketa horri GureGipuzkoa.net webgunearekin.
Edukien sozializazioa
Hori hitz gakoa eta Aldundiak giltzatzat hartu gura duena. Hain zuzen, hemen sorturiko edukiak uneoro eskuragarri izan eta kontsumo aktiboa sustatzea da helburua. Kultur edukiak digitalizatu eta hedatuko dituzte teknologia berrien bitartez.
Apustu horri helduko dieten ekimenei dirulaguntzak emango dizkie aldundiak, horrenbestez.
Hala ere, erakunde publikoek lemari heldu baino lehenago zabala eta sakona izan da euskal blogosferaren lana eta eragina. Aurkezpenean haien lana aitortu eta protagonismoa izan zuten euskal blogari zein sareko hedabideek. Ekitaldiko gonbidatua Cory Doctorow idazle eta aditu kanadiarra izan zen eta harekin egoteko aukera izan zuten blogariek ekitaldia hasi baino lehenago berbetan.