Auzitegi gorenak Segi erakundearen aurka egin nahi duen epaiketaren zilegitasun eza eta gazte mugimenduek jasaten duten jazarpena salatzea, baina era berean estatu frantziar zein espainiarrari gatazka politikoa bukatzeko borondatea adieraztea izan dira, deialdia luzatu dutenen hitzetan, gaur egin duten borroka egunaren helburu nagusiak.
Geldialdiak eta mobilizazioak
Goizeko hamaiketan, geldialdiak egin dituzte ikastetxeetan, eta eguerdian mobilizazioen txanda izan da. Arrasaten eta Bergaran egin dituzte ikasleek manifestazioak.
San Viator ikastolatik abiatu da Arrasateko mobilizazioetako bat, eta 20 manifestari inguruk ordu laurdenez Nafarroa etorbideko ibilgailuen bidea hautsi dute. Horrek, tentsio uneak eragin ditu.
Bergaran, berriz, manifestazioa hasi egin dute baina ertzainek galarazi egin dute manifestazioarekin jarraitzea.
Gaur arratsaldean Arrasateko herriko plazan kontzentrazioa egingo dute, arratsaldeko 19:30etik aurrera.
Lagun bat atxilotu dute Arrasaten
Arrasateko Goi eskola politeknikoko ikasleek ere agerraldia egin dute eta agerraldiaren ondoren lagun bat atxilotu dute ertzainek.
Ertzaintzaren arabera, Arrasate ibilbidean istiluak hasi dira ikasleek egin duten agerraldian eta Loramendi kalean edukiontzi bat iraultzen ikusi dute gaztea ertzainek. Atxiloketa geroago egin dute, 13:00ak aldera, Zarugalde kalean. 23 urteko gasteiztarra da atxilotua. Bergarako ertzain-etxera eraman dute eta desordena publikoa leporatzen diote.