Aldunditik ez dute irekieraren ordu zehatzik zehaztu. Hala azaldu dio Inaxio Garro alkateak Asteleheneko Goienkaria-ri. Hortaz, bost bat hilabete iraun duten lanetako bat bukatuta egongo litzateke. Oraindik falta da, baina, Arrasate eta Aretxabaleta arteko biribilgunea bukatzea. Aurreikuspenen arabera, hilabete honetan bukatu beharko lukete.
Biribilgunea, uztailean
Azken hilabetean aukera eman dute, aurreko hilabeteetan ez bezala, Arrasatetik Aretxabaletako noranzkoan bide zaharretik herrira sartzeko; ez ordea, Aretxabaletako puntu horretatik Arrasaterantz irteteko. Hortaz, ekainera arte Aretxabaletara sartu zein irteteko Azbetik saihesbidea hartu beharra zegoen; eta ekainetik hona sartu ez, baina irteteko ezinbestekoa zen hori.
Aretxabaletako alkate Inaxio Garrok azaldu du lan horiek "burukomin handia" eragin dietela aretxabaletarrei, eta "behin betiko osorik bukatzea" espero dutela.