Hainbat ekitaldi antolatu ditu astebururako Bergarako Abiadura Handiko Trenaren taldeak, tartean, mendi-martxa bihar goizean. Protesta ekitaldiekin, baina, atzo hasi ziren Arrasaten. Sozialisten egoitzaren aurrean protesta egin zuten 50 bat lagunek. Protestagileek salatu dute ohar baten bidez ez zietela pankartak ateratzen utzi, baimena eskatuta izan arren. Ertzaintzaren zaintzapean egin zuten protesta eta Barne Sailak adierazi duenez, istilurik amaitu zen agerraldia. Abiadura handiko Trenaren harira, berriki jakin da Europar Batasunetik dirulaguntza jasoko duela. 118 milioi euroko bultzada jaso du proiektuak eta Jaurlaritzak dio horrek frogatzen duela Europan pizten duela interesa.
Elkarretaratzea egin zuten atzo Abiadura Handiko Trenaren aurka Arrasateko PSE-EE-ren egoitzaren aurrean alderdi horren eta EAJren jarrera salatzeko. Taldekoek, helarazitako ohar baten bidez, salatzen dute isilik egin behar izan zutela protesta eta , hasiera baten, ez zietela utzi pankartak ateratzen nahiz eta, diotenez, baimena eskatuta zeukaten. Barne Sailak, bere aldetik dio, taldekoek baieztatutakoa ukatu barik, gertatutakoaren inguruko jakinarazpenik ez daukatela baina istilu barik amaitu zela guztia.
Protesta asteburua Bergaran
Trenaren proiektuaren aurka, hala ere, ekintza ugari antolatu dituzte Bergaran egunotarako. AHTaren aurkako aste bukaera deitu dute eta bihar goizean
mendi-martxa egingo dute Angiozarrera 09:30ean eta ostean bazkaria egingo dute.
Saio informatiboa ere egongo da gaur, egubakoitza 19:30ean gaztetxean. Egitarau guztia AHTk sareratu berri duen webgunean da.
Bertan ere aurki daitezke proiektuari buruzko xehetasunak eta
ibilbidea ere jaso dute mapa baten.
Ibarreko protestak ez dira asteburu honetan amaituko.
Manifestazio nazionala Arrasaten egingo da abenduaren 15ean.
"Interesa" Europan
Proiektuaren harira, Europar Batasunetik
118,53 milioi euroko dirulaguntza jasoko du AHTak, berriki jakin denez. Kopuru hori EBko Garraio Saileko buruak aurkeztu berri duen 2008-2013 urteetarako planean begiesten da. Nuria Lopez de Gereñu, Jaurlaritzako Garraio Sailburua pozik agertu da proiektuak Europatik jasotako bultzadarekin, esanez "lehentasunezko korridoretzat" jotzen dutela trena eta erakusten duela "proiektuak Europan pizten duen interesa".
