Gastronomia Zientzien Fakultateko lehen harria jarri dute

Donostiako Teknologia Parkean egongo da Gastronomia Zientzien Fakultatea eta 17,1 milioi euroko inbertsioa izango du proiektuak. 'Basque Culinary Center' Fundazioa, Mondragon Unibertsitatearen eta hainbat euskal sukaldariren eskutik sortu da; erakunde publikoen babesa ere badauka. Helburua, gastronomia-zientzien nazioarteko erreferente bihurtzea da. 18 hilabeteko epean eraikitzeko asmoa dute, 2011ko udarako.
Basque Culinary Center, Gastronomia Zientzien Fakultateko eraikinaren lanak abian dira. Gaur, hilak 9, proiektuaren sustatzaileak- tartean Mondragon Unibertsitatea- Donostiako Teknologia Parkean elkartu dira ekimen honi beren babesa emateko eta lehen harria jartzeko. Bertan izan dira ere,  Patxi López Lehendakaria,  Cristina Garmendia Berrikuntzako Ministroa;  Isabel Celaá Hezkuntza, Unibertsitate eta Ikerketa sailburua;  Odon Elorza Donostiako alkatea; Markel Olano Gipuzkoako Diputatu Nagusia; eta  Iosu Zabala Mondragon Unibertsitateko Errektorea. Ekimena babestu duten sukaldariak ere izan dituzte lagun.

2011-2012 ikasturterako prest

18 hilabete geratzen dira zentroaren jarduera abiarazteko eta aurreneko sukaldaritzako unibertsitate ikasleak hartzeko. Eraikina, 8.000 metro koadroko lursailean altxatuko da eta eremu hauek izango ditu: hainbat eremu sukalde lanetarako; esperimentaziorako gelak; pastelak, ogiak eta izozkiak egiteko tailerrak eta laborategiak; eta  ikerketarako eremua edota jatetxea, besteak beste.

Mondragon Unibertsitatea buru duen proiektua da eta 2011n, Espainiako Gastronomia Zientzietako lehen Fakultatea izango da; eta Europako bigarrena. Horrez gain, gastronomiaren eta elikagai-zientziaren alorreko Ikerkuntza eta Berrikuntza Zentroa edukiko du. Zentroaren helburua gastronomia-zientzietako arlotan  nazioarteko erreferentzia-gunea izatea da.

I+G+b-ko zentroaren helburua, berriz, goi-sukaldaritzako eta beste enpresa-sektore batzuetako profesionalen artean ikerketa eta ezagutzen transferentzia sustatzea da, baita gastronomiari zuzenean edo zeharka loturiko ezagutza-transferentzia ere, horien artean sinergiak sortzeko.

Mondragon Unibertsitateak sustatua

Basque Culinary Center, Mondragon Unibertsitateak eta nazioartean oso ezagunak diren sukaldariek sustatu dute. Erakunde publiko guztien babesa jaso du: Eusko Jaurlaritzarena, Berrikuntzako Ministerioarena, Gipuzkoako Foru Aldundiarena eta Donostiako Udalarena.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.