Garay, Cegasa eta Arcelor enpresek neurriak hartuko dituzte krisiaren aurrean

Oñatiko Garay enpresak krisiaren ondorioz, bertako langile guztiei eragingo dien enplegu erregulazio espediente bat iragarri du, baita Cegasak ere, Gasteizko lantegia ixtea eta 240 langile kaleratzea ekarriko dituena kasu honetan. Arcelor taldeak bere aldetik, bulegoetan eta komertzial gisa ari diren 600 lanpostu murriztu nahi ditu, eta horretarako, baja boluntarioetaz baliatuko da.

Oñatiko Hijos de Juan de Garay enpresak enplegu erregulazio espediente bat aurkeztuko duela iragarri zuen pasa den astean, enpresako arduradunen esanetan gaur egun automobilaren sektoreak eskatzen duen malgutasunera egokitu ahal izateko.

Lantegi honen produkzioaren zati handi bat tuboak dira. Tubo hauek, automobileko hainbat elementu egiteko erabiltzen dira, besteak beste, amortiguadoreak, airbagak eta direkziorako elementuak. Latoia ere ekoizten duten Garayn, eraikuntzan erabiltzen dena. Arduradunek adierazi dute  bai automobilaren sektoreak eta baita eraikuntzarenak bizi duten une txarrak behartuta hartu dutela enplegu erregulazio espedienteak aurkezteko

Garayko Enpresa batzordea ELA eta LAB sindikatuak osatzen dute, eta ELAtik esan digutenez, oraindik ez dute enpresaren erabakiaren inguruko beste  xehetasunik jaso. Esan dutenez, ez dute ondo ulertzen enpresaren erabakia, euren hitzetan duela hilabete oraindik jendea kontratatzen ari baitziren, eta  gaineratu dute era berean langileak nahiko haserre daudela, asko komunikabideetatik jakin baitzuten enpresaren erabakia.

Arcelor

Bergaran lantegia duen Arcelor Mittalek ere, bulegoetan zein komertzial moduan lan egiten dutenen artean 600 lanpostu murriztu gura dituela iragarri du. Enpresaren asmoa da, lanpostu murrizketa hau baja boluntarioen bidez egitea, hau da, langileek eurek eskatzea lana uzteko. Lana uzteko eskariak  datorren urteko urtarrilaren 31a baino lehen aurkeztu beharko dituzte langileek, eta baldintzak, banaka negoziatuko dituzte. Enpresako iturriek adierazi dutenez, bajak boluntarioak izatean ezin da zehaztu Bergaran zenbat lanpostu murriztuko diren, baina azpimarratu gura izan dute neurri hau ez diela fabriketako langileei eragingo, komertzial eta bulegoetako langileei bakarrik. Lab sindikatuarekin harremanetan jarrita, esan dute Bergarako lantegian abenduaren 19an egingo dutela bilera gai hau aztertzeko.

Cegasa

Oñatin lantegia duen Cegasa enpresak bere aldetik, enplegu erregulazio espedientea iragarri du. espediente honek, aurre erretiro eta  240 langileri eragingo die, eta kontsumorako pilak egiten dituen Gasteizeko lantegia ixtea ekarriko du. enpresako iturriek adierazi dutenez, prezioen eta salmenten jaitsieraren eraginez hartu dute enplegu erregulazio espedientea aurkezteko erabakia, aurten 22 milioi euroko galerak espero baitituzte.. Dena den, iragarri dute pila industrialak egiten dituen  Oñatiko lantegiak irekita jarraituko duela, baita beste alor batzutan aritzen diren Gasteizko instalazioak eta Txinako lantegiak ere. Hala, 1000 langile inguruko plantila mantenduko du Cegasak.


ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.