Egitasmo horren bultzatzaile Josu Lizarraldek Elikagaiak berreskuratu eta banatu: Ingurumen-helburu soziala izeneko egitasmoaren nondik norakoak azaldu ditu. Egun, galtzeko gertu dauden elikagaiak supermerkatuetako apaletatik kendu eta zabortegira botatzen direla azaldu du. Esaterako, jogurtak ageri den data baino astebete lehenago kentzen dira apaletatik. Proiektu horren bidez, elikagai horiek bildu eta behar dutenen artean banatuko dira; horrela, ingurumenera hondakin gutxiago botako dira.
Behar dituztenei banatu
Proba ez da gurean egingo. Eroskiren Hurbil eta Garberako supermerkatuetan bilduko dira hilero elikagaiak: fruta, barazkiak, ogia, jogurtak, hestebeteak eta aurrez egindako jakiak berreskuratuko dituzte eta Oiartzungo Agipad, Donostiako Haurtxoak-era eta Irungo Gurutze Gorrira eramango dira, behar dituztenen artean bana ditzaten.
Martxoan martxan
Martxoan jarri nahi dute martxan. Probak, gutxienez, hiru hilabeteko iraupena izango du. Emaitzak ikertu eta proiektua Gipuzkoa osora zabaltzea aztertuko dute.