Eusko Jaurlaritzako Osasun sailburu Gabriel Inclanek astelehenean egindako agerraldian, besteak beste, teknika berrien nondik norakoak, eta lortu gura dituzten helburuak azaldu zituen. "Helburu nagusiena da, 35 urtetik beherako emakumeen artean Down sindromea garaiz antzematea. Egun, amniozentesia 35 urtetik gorakoek egiten dute doan, eta gainerakoek ordaindu egin behar dute". Guzti hori azaltzeko datuak eman zituen: 2005. urtean, 66 haur jaio ziren Down sindromearekin Araban, Bizkaian eta Gipuzkoan. Haietatik hamabi erditzean edo haurdunaldian detektatu zituzten. Gainera, hamabi horietatik bederatzi kasutan, erditu zutenak 35 urtez azpiko emakumeak izan ziren."Guzti horrek bide berriak sortzera bultzatu gaitu", esan zuen Inclanek.
Analisi klinikoaren bidez
Orain arte 35 urtetik gorako emakumeek bakarrik zuten amniozentesia egiteko aukera. Baina. Osakidetzak martxan jarriko dituen teknikei esker, gaitz kromosomikoak garaiz antzemateko aukera izango dute haurdun dauden emakume guztiek.
Hain zuzen, analisi klinikoaren bidez egingo den proban, bi markagailu biokimiko eta ekografia egiteko aparailua erabiliko dituzte. Bestalde, teknika berriak gaitz kromosomikoak aurrez antzemateko eraginkortasuna hobetuko duela esan zuen Gabriel Inclanek. Horrela, kasuen %90etan antzeman ahal izango da fetuak Down sindromea edo beste gaitz kromosomikorik duen.
Bestalde, teknika berriaren bidez, fetua galtzeko dauden arriskuak murriztu gura ditu Osasun Sailak. "Egun, amniozentesia egiten dutenen %1ak fetua galtzeko arriskua du", esan zuen Jaurlaritzako Osasun sailburuak.
Bederatzi ospitaletan
Urrian hasiko dira teknika berria erabiltzen, besteak beste, Gipuzkoan, Debagoieneko, Zumarragako eta Mendaroko ospitaletan 2009. urteko urtarrilerako EAE osora zabaldu gura dute.