Everesteko tontorrera igotzen hasiko dira gaur, eguena

Hartu dute erabakia. Naturgas Hornbein espedizioak gaur, eguena, hasiko du Everesterako igoera. Eguraldi iragarpen ona jaso eta Vallejo, Iñurrategi eta Zabaltza berehala hasi dira lanean. Atzo 6.100 metrora igo ziren, japoniarren korridore hasierara. Han denda txikian lo egin ondorem, gaur goizean hasiko dute zailtasun handiko eskalada saioa, Hornbein korridoretik gora. Aurreikuspenak betetzen badituzte domekan Everesteko tontorrera iritsiko dira.

Hiru aste oinarrizko kanpamenduan egin eta gero iritsi da benetako erronkaren unea. Eguraldi ona iragarri dute astebururako, eta aurreikuspenak betetzen badituzte domekan Everesteko tontorrera iritsiko dira Juan Vallejo, Mikel Zabaltza eta Alberto Iñurrategi.

Mendizaleen asmoa da egubakoitzean 7.000 metroraino igotzea, eta zapatua erabiltzea beste mila metroko desnibela gainditzeko. Hori lortuta, domeka goizaldeko lehenengo orduetan Everesteko tontorrera iritsiko lirateke, eta ondoren jaitsierari ekin. Baina, kontutan izan espedizioko kideek hainbat zailtasuni egin beharko dietela aurre, euren artean, eskaladan zehar ze zailtasun tekniko izango dituzten aurrez ez jakitea, izan ere, azken 18 urtetan inork ez du Hornbein korridorean gora egin. Eta noski, sherpen laguntzarik, oxigenorik eta soka finkorik ez erabiltzeak ere areagotu egingo ditu zailtasunak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.