Aurten euskararen aldeko aurrekontua dezente murriztu da, ez, ordea, jendearen parte hartzea, ezta elkarteen jarduna ere. Hala eman du aditzera Eñaut Muxika AEDko lehendakariak. Momentuko arazo ekonomikoei aurre egiteko, hori bai, bazkideen ekarpena Euskalgintzako hiru elkarteen artean banatzea proposatu zuen, zapatuan egindako batzar nagusian. Izan ere, krisi ekonomikoa eta murrizketak direla-eta hirurek aurreikusi dute zuloa 2010erako.
Datozen hiru urteak oso gogorrak izango direla aurreikusten dute eta egoera zail horri aurre nola egin aztertzeko batzorde berezia osatu dute. Antzerako egoera izango dute gainerako euskara elkarte eta hedabideek ere, Gipuzkoako Foru Aldundiak milioi bat euro gutxiago bideratuko baitu euskara sustatzera aurten: iaz baino %33,5 gutxiago, hain zuzen. Berri txarra dudarik gabe gure bailarako hedabideentzat zein elkarteentzat.
Jasone Mendizabal Topaguneko zuzendariaren ustez, euskal elkarteen jarduera zabala da eta murrizketek horien jarduna arriskuan jartzen dutela adierazi du.
Krisiaren eragina nabarmena izan da Aldundiak aurkeztutako aurrekontuan, eta euskal elkarteek ez dute haren borondatea zalantzan jartzen, bai, ordea, hainbat erakunderen zentraltasuna. Horregatik, espazioak galtzen ari direla salatu dute. Gogoeta egin dezatela eskatu diete euskal elkarte zein hedabideek erakundeei.