Gaur arratsaldetik aurrera zaparrada eta ekaitz gogorrak espero dira; denbora gutxian euri asko, alegia. Pello Zabalak arratsalde erditik gauerdira bitartean euri asko egingo duela dio, baina Debagoienari dagokionez ez du uste hainbesterako izango denik. "Kostaldean eta Kantabria aldean botako du bortitzen", adierazi du. Goiena Magazinean emango ditu xehetasun guztiak.
Gaurko, martitzeneko iragarpena. Euskalmet
"Eguraldia nabarmen ezegonkortuko da. Eguneko bigarren partean eta kantauri isurialdean gehiago nabarituko dugu. Orduan zaparrada ugari botako ditu eta ekaitzak ere jo dezake. Ipar-ekialdeko haizea ibiliko da eta tenperatura maximoak 20 ºC-ren azpitik geratuko dira".
Eguazteneko iragarpena. Euskalmet
"Asteazkenean euripean egongo gara. Zerua oso hodeitsu egongo da eta euria barra-barra botako du. Pilaketa handiena goizean espero dugu eta trumoi-ekaitzak ere jo dezake. Norabide aldakorreko haizea ahul-bizi ibiliko da, iparraldekoa nagusituz. Tenperatura maximoak 18-19 ºC-ren inguruan ibiliko dira".
|